کوژرانی لاوێکی تری مه‌ریوانی

1386/7/11

"عه‌تای به‌هرامی" ناسراو به‌ عه‌تای ڕه‌حمانی مامه‌ ڕه‌شه‌ ته‌مه‌ن ۱۸ساڵ خه‌ڵکی ئاوایی جه‌ژنیاوا (له‌ گونده‌کانی سه‌ر سنوور) شه‌وی ڕابردوو له‌ کاتێکدا ئه‌یوست به‌ ئه‌سپه‌که‌ی بچێت بۆ سه‌ر سنوور و به‌ هناینی که‌ل و په‌ل بژێوی ژیانی خۆی و بنه‌ماڵه‌که‌ی دابین بکات به‌ گوله‌ی پاسه‌وانه‌کانی سه‌رسنووری کۆماری ئیسلامی گیانی خۆی له‌ ده‌ست دا.

شایانی باسه‌ عه‌تا ته‌نها کوڕی ئه‌و بنه‌ماڵه‌ بوو، ئه‌ویش ‌ وه‌کوو زۆربه‌ی لاوه‌کانی ئه‌م ناوچه‌یه‌ له‌ ناچاریدا ڕوو ده‌که‌نه‌ ئیشه‌کانی سه‌ر سنوور که‌ زۆربه‌ی کات گیانیان له‌ مه‌ترسیدایه‌. ‌

باروودۆخی خراپی عه‌دنان و هیوا له‌ به‌ندیخانه‌نه‌ی گشتیی دا

1386/7/8

"عه‌دنان حه‌سه‌ن پوور" و "هیوا بووتیمار" که‌ ۸ ڕۆژ له‌مه‌و پێش له‌ به‌ندیخانه‌ی ئیتیلاعاته‌وه‌ بۆ به‌ندیخانه‌ی گشتیی گواسترانه‌وه‌ له‌ بارودۆخێکی خراپدا به‌سه‌ر ده‌به‌ن.

بنه‌ماڵه‌ی ئه‌و دوو به‌ندکراوه‌ دوای تێپه‌ڕکردنی ته‌نگ و چه‌ڵه‌مه‌یه‌کی زۆر توانیان ئه‌و دوانه‌ له‌ پشتی شیشه‌وه‌ ببینن. عه‌دنان و هیوا ئاوا باسی باروودۆخی به‌ندیخانه‌که‌یان ده‌که‌ن:

ئێمه‌ له‌ به‌ندێکداین که‌ پێی ده‌ڵێن به‌ندی نیزامی، له‌م به‌نده‌دا ۴۰ که‌سی تێدایه‌، ئیمکاناتێکی زۆر هه‌یه‌ لێره‌ بۆ به‌ندکراوه‌کان، بۆ نموونه‌ کتێبخانه‌و وه‌رزشگه‌و کیوسکی ته‌له‌فوون هه‌یه‌و هه‌روه‌هادوکتریشی تێدایه‌ بۆ چاره‌سه‌رکردنی نه‌خۆشیه‌کان، به‌ڵام به‌داخه‌وه‌ که‌ڵک وه‌رگرتن له‌و ئیمکاناته‌ بۆ ئێمه‌ قه‌ده‌غه‌یه‌. ئێمه‌ بۆمان نیه‌ کتێب بخوێنینه‌وه‌، وه‌رزش بکه‌ین و بۆ بنه‌ماڵه‌کانمان ته‌له‌فوون بکه‌ین یان ئه‌وه‌ی که‌ بچینه‌ لای دوکتور بۆ چاره‌سه‌ر کردنی نه‌خۆشیه‌کانمان. هاوبه‌نده‌کانمان له‌و مرۆڤانه‌ نین بتوانین هیچ پێوه‌ندیه‌ک له‌ گه‌ڵیان بگرین، مرۆڤ کوژو مه‌واد فرۆش و دز و ... له‌وانه‌ له‌ لامان ئه‌ژیه‌ن.له‌ به‌ندیخانه‌ی ئیتیلاعات دا لانی که‌م له‌م جۆره‌ مرۆڤانه‌ به‌ دوور بووین.

گواستنه‌وه‌ی عه‌دنان و هیوا بۆ به‌ندیخانه‌ی گشتیی سنه‌

1386/7/3

"عه‌دنان حه‌سه‌ن پوور" و "هیوا بووتیمار" دوای دوو مانگ و ۹ ڕۆژ به‌سه‌ر بردن له‌ به‌ندیخانه‌ی ئیتیلاعات دا، ڕۆژی یه‌کشه‌ممه‌ "۱" خه‌زه‌ڵوه‌ر بۆ به‌ندیخانه‌ی گشتیی شاری سنه‌ گوێزرانه‌وه‌.

ناوبراوان چه‌ند ڕۆژ پێش ڕاگه‌یاندنی حوکمه‌که‌یان له‌ به‌ندیخانه‌ی گشتیی شاری مه‌ریوانه‌وه‌ به‌ره‌و شوێنێکی نادیار بران، دوای نزیکه‌ی دوو حه‌فته‌ بنه‌ماڵه‌کانیان ئاگادار بوونه‌وه‌ که‌ ئه‌و دوانه‌ له‌ به‌ندیخانه‌ی ئیتیلاعات دان و تا ماوه‌یه‌کی زۆریش هه‌ر جۆره‌ سه‌ردانێکیان قه‌ده‌غه‌ بوو.

شایانی باسه‌ عه‌دنان و هیوا کاتێ که‌ له‌ به‌ندیخانه‌ی ئیتیلاعات دا بوون بۆ ماوه‌ی ۴۸ ڕۆژ مانیان له‌ نان خواردن گرت که‌ یه‌ک له‌ داخوازیه‌کانیان، گواستنه‌وه‌یان بۆ به‌ندیخانه‌ی گشتیی بوو.

سروشت میراتی ڕابردوو نیه‌، به‌ڵکوو ئه‌مانه‌تی داهاتوویه‌

1386/6/28

به‌ نێوی خوداوه‌ندی ده‌هه‌نده‌و دلۆڤان

ئـــــــــــــــــــــــــــاگـــــــــــــــــــــاداری

سروشت میراتی ڕابردوو نیه‌، به‌ڵکوو ئه‌مانه‌تی داهاتوویه‌

به‌ بڕوای زۆربه‌ی ئێکۆلۆژیسته‌کان، دارستانه‌کانی زاگرۆس یه‌کێک له‌ ئیکۆسیستمه‌ تاقانه‌کانی سه‌ر گۆی زه‌وینن. ئه‌م دارستانانه هاوکات له‌ گه‌ل ئه‌وه‌ی که‌ پانتاییه‌که‌ی ده‌گاته ‌۵ ملیۆن هێکتار، خاوه‌نی جۆراوجۆریه‌تییه‌کی تایبه‌ته‌ و توانایه‌کی زۆری بۆ زێده‌بوون هه‌یه‌. دارستانه‌کانی مه‌ریوان که‌ وه‌ک به‌شێک له‌ دارستانه‌کانی زاگرۆس دێنه‌ ئه‌ژمار ۹۷۲۷۰ هێکتار پانتاییان هه‌یه‌و به‌ واتایه‌کی تر  ۴۰ له‌ سه‌دی پانتایی ناوچه‌ی مه‌ریوان ده‌گرنه‌وه‌ و به هۆی هه‌ل و مه‌رجی له‌ باری ئاووهه‌واییه‌وه‌ دۆخی  ژینگه‌یی ئه‌م ناوچه‌یه‌ له‌ ناوچه‌کانی تری زاگرۆس باشتره‌. دارستانه‌کان وه‌ک خه‌ڵاتێکی خوداوه‌ندی قازانجی زۆریان هه‌یه‌ و ئه‌گه‌ر به‌ باشی ورد ببینه‌وه‌ بۆمان ده‌رده‌که‌وێت که‌ کاریگه‌رێتیه‌کی زۆریان له‌ سه‌ر گه‌شه‌ی ئابووریی مه‌ریواندا هه‌یه‌: کانی ئاو و باغی جوان و سه‌ردانی ئه‌و هه‌موو گه‌شتیارانه‌ له‌م شاره‌مان وێنه‌یه‌کی بچکۆلانه‌یه‌تی. به‌ڵام مه‌خابن که‌ زۆربه‌ی خه‌ڵک سه‌رنجێکی ئه‌وتۆ ناده‌نه‌ ئه‌م بابه‌ته‌. ده‌بێ بڵێین که‌ ئه‌م سروشته‌ جوان و ڕازاوه‌یه‌ به‌ هۆی جیاواه‌وه‌ خه‌ریکه‌ کاول ده‌کرێت و گه‌وره‌ترینی ئه‌م هۆکارانه‌ش ئاگره‌.

ئاگر کاریگه‌رێتییه‌کی درێژخایه‌ن ده‌کاته‌ سه‌ر ئیکۆسیستم، گه‌ڕی مادده‌ کانزاییه‌کان، ئامێته‌ی چه‌شنه‌کانی ڕوه‌ک، گه‌شه‌کردنی گیاکان، ژیانی گیانله‌به‌ران و هه‌روه‌ها ڕاماڵینی خاک و هاتنی لافاو.

به‌ پێی ئه‌ژماره‌کانی ئیداره‌ی سه‌رچاوه‌ سروشتییه‌کانی مه‌ریوان و ئیداره‌ی گشتیی سه‌رچاوه‌ سروشتییه‌کانی کوردستان، ئاگرکه‌وتنه‌وه‌ گه‌وره‌ترین هۆکاری مه‌ترسی و کاولکردنی دارستانه‌کانی زاگرۆس و ڕۆژئاوای ئێران و به‌ تایبه‌ت مه‌ریوانه‌. هه‌موو ساڵێک ڕاده‌ی خه‌ساردانی ئاگر چه‌ند قاتی کۆی  هه‌موو ئه‌و هۆکارانه‌ی تره‌ که‌ ده‌بنه‌ هۆی تیاچوونی دارستانه‌کان.هه‌موو ساڵێک پانتاییه‌کی زۆر له‌ دارستانه‌کانی ده‌سووتێت و ئه‌مه‌ش بۆ خۆی ده‌بێته‌ هۆی له‌ ناوچوونی هاوکێشه‌یی ژینگه‌، چه‌شنگه‌لی گیایی، گیانله‌به‌ران و حه‌شه‌ره‌کان و ژینگه‌که‌یان. به‌ پێی ڕاپۆرتی ئیداره‌ی سه‌رچاوه‌ سروشتییه‌کانی مه‌ریوان له‌ ساڵی ۱۳۸۵ (ی هه‌تاوی) دا، ۴۷ ئاگر له‌ دارستانه‌کانی مه‌ریوان و سه‌وڵاوا به‌ربووه و ۱۲۳ هێکتار له‌ دارستانه‌کانی ئه‌م ناوچانه‌ سووتاون و به‌رانبه‌ری ۹۴۶۹۲۷۵۱۰۰ ڕیاڵ زیان له‌م دارستانانه که‌وتوه‌.

هۆکارگه‌لێک وه‌ک: گۆڕینی دارستان بۆ باغ، داگیرکردنی زه‌وین به‌ مه‌به‌ستی کشت وکاڵ و داسوکنین، بێ موبالاتیی خه‌ڵک، کێشه‌ تائیفیه‌کان و له‌ هه‌موو ئه‌مانه‌ گرنگتر کاره‌ ئه‌منیه‌تیه‌کانی هێزه‌ ئینتیزامیه‌کان، ئه‌م دۆخه‌ ناله‌باره‌یان ڕه‌خساندوه‌.

هه‌ل و مه‌رجی هه‌نووکه‌یی دارستانه‌کانی ئه‌م ناوچه‌یه‌ قه‌یارانییه‌ و ئه‌مساڵیش چه‌ندین ئاگر له‌م ناوچه‌یه‌ که‌وتۆته‌وه‌ و زیاتر له‌ ۲۵۰۰ هێکتار له‌ دارستانه‌کان سووتاون و ئێستاکه‌ش ئه‌م ڕه‌وته‌ هه‌ر به‌رده‌وامه‌ و یان پێشی پێ نه‌گیراوه‌ وه‌یان ئه‌گه‌ر هه‌وڵێکیش درابێت له‌ به‌رانبه‌ر به‌ربڵاوی ئاگره‌کان، به‌رچاو نییه‌، ئه‌مه‌ له‌ حاڵێکدایه‌ که‌ به‌ پێی ئاسڵی ۵۰ ی یاسات بنه‌ڕه‌تی ئێران ده‌بێ له‌ ئاوه‌ها هه‌ل و مه‌رجێکدا ته‌واوی ئۆرگانه‌ چه‌کداره‌کان به‌ره‌نگاری ئه‌م قه‌یرانگه‌له‌ ببنه‌وه‌.

ده‌بێ بڵێین که‌ به‌ هۆی نه‌بوونی بوودجه‌و پێداویستی کافی، ئیداره‌ی سه‌رچاوه‌ سروشتیه‌کانی مه‌ریوان به‌و چه‌شنه‌ی که‌ پێویسته‌ نه‌یتوانیوه‌ به‌رنگاری ئه‌م ئاگر گرتنه‌ به‌ربڵاوانه‌ ببێته‌وه‌.

ناشاره‌زایی له‌ مه‌ڕ ژینگه‌، نه‌ناسینی قازانجه‌کانی دارستان و هه‌روه‌ها گوێنه‌دانی کۆمه‌ڵگا بۆته‌ هۆی له‌ ناوچوونی سه‌رمایه‌ نه‌ته‌وه‌ییه‌کان. هیوادارین که‌ به‌رپرسان ئاوڕێک له‌م پرسه‌ بده‌نه‌وه‌ تا چی تر ئه‌م کاره‌ساتانه ڕوو نه‌ده‌ن.

   

                                           ئاگاداریی هاوبه‌شی ڕێکخراوه‌ خه‌ڵکییه‌کانی مه‌ریوان‌ 

پێشێل کردنی یاسا و سیاسەتی بێدەنگی بەردەوامە (راگەیەندراوی ژمارە10)

1386/6/15

ڕاگەیەندراوی ژمارە10ی 

کۆمیتەی هاوبەشی پشتیوانی لە عەدنان حەسەنپور و هیوا بوتیمار

 

ڕای گشتیی جیهان

 

ڕێکخراوی نەتەوە یەکگرتووەکان

 

هەموو ناوەندو ڕێکخراوە ماف پارێزەکانی جیهان

 

هەروەکو ئاگادارن دە سەڵاتدارانی ئێران بۆماوەی 9 مانگەڕۆژنامەوان عەدنان حەسەنپوور وچالاکی مەدەنی هیوا بوتیماریان لەگرتووخانەکانی خۆیان توند کردوە و بەشێوازی دەستگیر کردن و راگرتنیان و دەرئەنجام بڕیاری سێدارە بۆ ئەوان، لە بچوکترین مافی مرۆیی بێبەش کراون.

بەم پێیە ئەم دووچالاکە ڕووبەڕووی ئەستەمترین گوشاری جەستەیی وڕەوانی بونەتەوە و لە پێناو سیاسەتی کپ کردنی هەموو دەنگ و بیرێکی جیاواز بە هەر نرخ و بەهایەک. نزیک بونەوەی ناوبراوان لەمەرگیش لای کاربەدەستان نەک هەر گرینگیی نیەبەلکو شیوازێکی پەسەند کراوی ئەوانە.

پاش 50 ڕۆژ مانگرتن، ئەو چالاکانەئێستاکەلەسەرداوای ناوەندە ماف پارێزوپیشەیی ومرۆییەکانی جیهان و لەوڵامی دڵسۆزان ئەو مانگرتنەیان شکاندووە ، دەزگای داوەری و ناوەندە ئەمنییەکانی ئێران لەدرێژەی بێ دەنگی وپێشێل کردنی یاسا و مافی ئینسانەکاندا دوور لە هەر چاودێرییەکی پزیشکی و تەندروستی و ئامادە کردنێکی پێویستی دوای مانگرتن ئەو چالاکانەیان لە بەندی تاکەکەسیدا ڕاگرتووە و هێشتا هیچ کام لەویست و داخوازیە ڕەواکانیان جێبەجێ نەکردون.

 

 ئێمەوەک کۆمیتەی هاوبەشی پشتیوانی لەئەو چالاکانەجارێکی تر داوا لەڕای گشتی جیهان دەکەین کەلەئا ست ئەم پێشێلکارییانەی دەسەڵاتدارانی ئێراندا دەنگی ناڕەزایەتی و توڕەیی خۆیان هەڵبڕن و گوشارە کانیان زیاتر کەن و داوا لەحوکمڕانانی ئێران بکەن کەهەرچی زووتر ئەم چالاکانەئازادبکات.

هەرلێرەوە ئەمەک ناسیی خۆمان لەئاست کردەی شیاو و بەنرخی ئەو بەڕێزانەیش ڕادەگەیەنین کە بۆهاو دەردی و هاودەنگی عەدنان و هیوا مانیان لە خواردن گرتووە داوایان لێدەکەین کەئەوانیش دە ست لەمانگرتن هەڵگرن.

 

کۆمیتەی هاوبەشی پشتیوانی لەعەدنان حەسەنپو و هیوا بوتیمار

 

2007.09.05

k_pshtiwani@yahoo.com

adnanhasanpoor@yahoo.com

kempainp@yahoo.com

دارستانه‌کانی مه‌ریوان بوه‌ به‌ قوربانی پیلانه‌کانی سوپای پاسداران

 1386/6/14

ماوه‌یه‌که‌ له‌ ناوچه‌ی مه‌ریوان شه‌ڕو پێکدادان له‌ نێوان هێزه‌کانی سوپای پاسداران و که‌سانی نه‌ناسراوه‌ ده‌ستی پێ کردوه‌. هه‌ڵبه‌ت ئه‌مه‌ سه‌ره‌تای ڕووداوه‌کان نیه‌ ئه‌م شه‌ڕانه‌ له‌و کاته‌وه‌ ده‌ستی پێ کرد که‌ له‌ چه‌ند شوێنی ناوچه‌ی مه‌ریوان خه‌ڵکی بێ گوناه به‌ ده‌ستی هێزه‌کانی ده‌وڵه‌تیی ته‌قه‌یان لێ ده‌کراو بریندار یان ئه‌کوژران. پاش کوشتنی به‌ختیار موحه‌مه‌دی و وریا موحه‌مه‌دی، ئه‌بووبه‌کر دهوه‌ند، که‌مال مه‌حمودی و چه‌ند که‌سی تر له‌ دێهاته‌کانی ده‌ورو به‌رو گیرانی هه‌موو ڕۆژه‌ی ڕۆشنبیران و ڕۆژنامه‌وانان و شاعیران و که‌سایه‌تیه‌ بیرجیاوازه‌کانی شار... به‌ گشتی ئه‌م ئاژاوانه‌ دوای ئه‌وه‌ ده‌ستی پێ کرد که‌ ده‌وڵه‌ت زه‌ختی خۆی بۆ سه‌ر خه‌ڵک له‌ قۆناغه‌کانی جۆراوجۆردا زیادتر کرد.

ئه‌و که‌سانه‌ به‌ دوان و  سیان و پێنج له‌ هێزه‌کانی سوپای پاسداران (به‌ زۆری) له‌ کات و شوێنی جۆراوجۆردا ئه‌کوژن. چریکی کورد فێره‌ به‌ ژیان له‌ که‌ژو کێوه‌کاندا، ئه‌وان  ناوچه‌کان و شاخه‌کانی وڵاتیان  وه‌کوو له‌پی ده‌ستی خۆیان به‌ڵه‌ون و باش ئه‌زانن چۆن خۆیان له‌وێدا حه‌شار بده‌ن. بۆیه‌ کاتی خۆی فه‌رمانده‌یه‌کی سوپا کاتێ له‌ تارانه‌وه‌ به‌ره‌و کوردستان بۆ شه‌ڕ له‌ گه‌ڵ هێزه‌ چه‌کداره‌ کوردیه‌کان به‌ ڕێکه‌وتبوون به‌ هێزه‌کانی خۆی وتبوو؛ به‌ ئه‌ندازه‌ی هه‌موو دارو ده‌وه‌نه‌کانی کوردستان له‌ گه‌ڵ خۆتان فیشه‌ک بهێنن چونکه‌ له‌وانه‌یه‌ هه‌ر دارو دره‌ختێک له‌وێ کوردێکی چه‌کداری لێ بێته‌ ده‌ره‌وه‌.

به‌ڵام ئه‌مجاره‌یان ده‌وڵه‌ت ئاوه‌های نه‌کرد، به‌ڵكوو ده‌ستی دایه‌ له‌ ناوبردنی ئه‌و دارو دره‌ختانه‌ له‌ ڕێگه‌ی سووتاندنه‌وه‌. به‌ڵێ سوپای پاسداران سیاسه‌تی سووتاندنی هه‌موو شاخه‌کانی کوردستانی گرتوه‌ته‌ به‌ر. ئه‌م سیاسه‌ته‌ تا ئێستا له‌ ناوچه‌ی مه‌ریوان زۆر به‌رچاوه‌، یه‌که‌م ئاگره‌کان له‌ کێفه‌کانی نزیک شاره‌وه‌ ده‌ستی پێ کرد، له‌ ۳ کیلۆمتری مه‌ریوان بازگه‌یه‌کی نیزامی تێدایه‌، دارستانه‌کانی ئه‌و ده‌وروبه‌ره‌ سووتێندرا. ئه‌و کاته‌ که‌س نه‌یئه‌زانی ئه‌مه‌ کاری کێ بوه‌. پاش ماوه‌یه‌ک دارستانه‌که‌ی دۆڵێک له‌ پشت فه‌له‌که‌ی بێسارانیه‌وه‌ گڕی تێ به‌ر بوو که‌ خه‌سارێکی زۆری له‌و شوێنه‌ دا. کێفه‌کانی لای ئاوایی "نژمار" له‌ قوربانیه‌کانی دواتر بوو، ئاگره‌که‌ی ئه‌وێ ئه‌وه‌نده‌ زۆر بوو که‌ سێ شه‌وو سێ ڕۆژ هه‌ر درێژه‌ی هه‌بوو. هه‌ر ڕۆژێکی به‌سه‌ر دا نه‌چوو که له‌ کێفه‌کانی شارۆچکه‌ی سه‌وڵاوا دووکه‌ڵ هه‌ڵده‌ستا. تا ئه‌و کاته‌ گومانی ئه‌وه‌ هه‌بوو که‌ ئه‌م ئاگرانه‌ به‌ ڕێکه‌وت نیه‌ به‌ڵکوو به‌ شێوه‌یه‌کی ئۆرگانیزه‌ کراو بوه‌. به‌ڵام هێشات نه‌زانرابوو که‌ ئه‌مه‌ کاری سپای پاسدارانه‌ تاکوو دواتر خۆیان ئه‌وه‌یان ده‌رخست. له‌ ئاوایی "سه‌ڵه‌سی" کاتێ ئاگر به‌ر ده‌بێت هه‌ر له‌ سه‌ره‌تاکه‌یه‌وه‌ خه‌ڵک ئاگادار ده‌بنه‌وه‌، بۆیه خه‌ڵکی ئاوایی به‌ ڕێ ئه‌که‌ون بۆ کوژاندنه‌وه‌ی ئاگره‌که‌ به‌ڵام له‌ ڕێگادا دوو ماشینی سپا به‌ریان پێ ئه‌گرێت و ناهێڵن به‌ره‌و شوێنی ئاگره‌که‌ بڕۆن، ئه‌وان ئه‌ڵێن که‌ گوایه‌ ئێمه‌ له‌وێدا کاری نیزامی خۆمان هه‌یه‌و دوای ته‌واو بوونی کاره‌که‌مان خۆمان ئاگره‌که ئه‌کوژێنینه‌وه‌، ئه‌و ئاگره‌ تا ڕۆژێک دواتر هه‌ر ڕۆشن بوه‌، کاتێ ئکیپی ئیداره‌ی سه‌رچاوه‌ سروشتیه‌کان ئه‌گه‌نه‌ ئه‌وێ ئه‌وانیش هه‌ر ئه‌وه‌ ئه‌ڵێن که‌ له‌ لایه‌ن سپاوه‌ پێییان گوتراوه‌ که‌ تا ته‌واو بوونی عه‌مه‌لیاته‌که‌مان بۆتان نیه‌ بێن به‌و ده‌ورو به‌ره‌دا.

جووتیارێکی "سه‌ردۆش"ی ئاوا باسی ئاگره‌که‌ی لای سه‌ردۆش ئه‌کات: قاوه‌توونێک بوو که‌ چوار پێنج ماشین له‌ هێزه‌کانی سپای پاسداران به‌ هه‌موو ئیمکاناتێکی نیزامیه‌وه‌ به‌ره‌و لای یه‌کێ له‌ کێفه‌کانی سه‌ردۆش هاتن. یه‌ک دوو سه‌عاتێک هه‌ر ته‌قه‌ی گوله‌ ئه‌هات، پاشان بۆچه‌ک له‌و کێفه‌وه‌ هه‌ڵسا، ئه‌وان له‌ داوێنی کێفه‌که‌ دوورۆ که‌وتن. ئێمه‌، هه‌ندێ له‌ جووتیاره‌کانی ئه‌و ده‌وروبه‌ره‌ ویستمان نزیک دووکه‌ڵه‌که‌ بکه‌وینه‌وه‌، هێزه‌کانی سوپا به‌ره‌و ئێمه‌ هاتن و وتیان هه‌ر که‌سێک بیه‌وێت ئه‌و ئاگره‌ بکوژێنێته‌وه‌ خۆیشی وه‌ک ئه‌و دارانه‌ ئه‌سووتێندرێت.

تا ئێستا خه‌سارێکی نه‌گه‌ڕاوه‌ی هه‌ره‌ زۆر دراوه‌ له‌ ئوکۆسیستمی زۆرێک له‌ شاخه‌کانی مه‌ریوان و که‌سیش نیه‌ ئاوڕێک له‌م مه‌سه‌له‌یه‌ بداته‌وه‌. 

کوشتنه‌کانی ده‌سه‌ڵات و ڕۆڵی پیاوه‌ ئایینیه‌کان

1386/5/31

هه‌رچه‌نده‌ مێژووی کورد هیچ کات خاڵی نه‌بوه‌ له‌ کوشتن و بڕین له‌ لایه‌ن ده‌ساڵه‌ته‌ ئیستیعماره‌کانه‌وه‌، به‌ڵام کوشتنه‌کانی ئه‌م چه‌ن ساڵه‌ی دوایی و به‌ تایبه‌ت کوشتنه‌کانی ناو بازاڕ یه‌ک شتمان پێ ئه‌ڵێت؛ ئه‌ویش ئه‌وه‌یه‌ که‌ ده‌سه‌ڵاتی داسه‌پاو بۆ هێشتنه‌وه‌ی خۆی له‌ هه‌موو ڕێگایه‌ک که‌ڵک وه‌ر ئه‌گرێت. یه‌ک له‌وانه‌ که‌ڵک وه‌ر گرتن له‌ هه‌ستی ئایینی خه‌ڵک له‌ ڕێگای پیاوه‌ ئایینیه‌کانه‌وه‌یه‌.

هه‌موان ئه‌زانین که‌ خه‌ڵك مه‌لای نوێژی هه‌ینی زۆر قه‌بووڵه‌ و ڕۆژای هه‌ینی خه‌ڵکێکی زۆر، کارتۆن به‌ده‌ست ڕێ ئه‌که‌ون بۆ نوێژ خوێندن له‌ پشتی مه‌لای نوێژی هه‌ینی. وه‌ک جارێکی تر هه‌ر له‌ وێبلاگه‌دا باسم کرد ده‌وڵه‌ت هه‌موو کات دوای ئه‌وه‌ی که‌سێک ئه‌کوژێت، مه‌لای نوێژی هه‌ینی ئه‌بات بۆ ئارام کردنه‌وه‌ی خه‌ڵک(ئه‌ڵبه‌ت من زیاتر له‌ سه‌ر ڕووداوه‌کانی مه‌یوان قسه‌ ئه‌که‌م)، چونکه‌ باش ئه‌زانێت که‌ ئه‌و خه‌ڵکه‌ داماوه‌ قسه‌ی مه‌لا به‌ قسه‌ی خوا  و لادان له‌ قسه‌ی ئه‌و به‌ گوناه ئه‌زانن. ئه‌مه‌ له‌ ڕۆڵی مه‌لای نوێژی هه‌ینی. مه‌لا ئاسایه‌کانیش هه‌ر ئه‌و کاره‌ ئه‌که‌ن به‌ڵام به‌ شێوه‌گه‌لی تر، که‌ ‌من لێره‌دا ته‌نها باس له‌ یه‌کێ له‌و شێوانه‌ ئه‌که‌م:

- کاری خوایه‌ چی بڵێین...

- که‌س هیچی له‌ ده‌س نایه‌ت خوا نه‌بێت...

- ئه‌وانیش نه‌بوایه‌ن هه‌ر خوا ته‌مه‌نی ئه‌م مرۆڤه‌ی ته‌واو کردبوو...

- خوا خراپتر نه‌یات...

...

پیاوه‌ ئایینیه‌کان به‌ هێنانه‌وه‌ی ئه‌م ده‌سته‌ واژانه‌به‌رگری له‌ بۆچوونی مه‌نتیقی خه‌ڵک ئه‌گرن و بیری خه‌ڵکی داماو به‌ره‌و فه‌زایه‌کی عرفانی ڕائه‌پێچن. به‌ره‌و شێوه‌ بیر کردنه‌وه‌یه‌ک ئه‌یانێرن که‌ تێیدا مرۆڤ بێ ده‌سه‌ڵاته‌ له‌ ڕووداوه‌کانی ده‌وروبه‌ریداو مافی ده‌ستێوه‌ردانیشی نیه‌ . ئه‌وان به‌رده‌وام خه‌ڵک بۆ سه‌برو بێده‌نگی ده‌عوه‌ت ئه‌که‌ن و به‌ هانینه‌وه‌ی ئایه‌و حه‌دیسی جۆراوجۆر له‌ ڕاستیدا فه‌زاکه‌ به‌ره‌و شوێنێک ئه‌به‌ن که‌ ده‌سه‌ڵات ئه‌یه‌وێت.‌

درێژه‌ی هه‌واڵی کوشتنی "ئه‌بووبه‌کر دهوه‌ند" و "که‌مال مه‌حموودی" له‌ مه‌ریوان

1386/5/29

ئه‌بووبه‌کر دهوه‌ند ته‌مه‌ن 25 ساڵ و که‌مال مه‌حموودی ته‌مه‌ن 27 ساڵ خه‌ڵکی ئاوای وه‌یسه‌ی مه‌ریوان  شه‌وی یه‌کشه‌ممه‌  19 ی ئاگۆست له‌ ناو شاری مه‌ریواندا به‌ ده‌ستڕێژی هێزه‌کانی سوپای پاسداران کوژران . ئه‌م دوو که‌سه‌ له‌ گه‌ڵ گه‌نجێکی تری خه‌ڵکی هه‌مان دێ به‌ سواری ماشینێکی ئیسته‌یشن له‌ بۆکانه‌وه‌ به‌ره‌و مه‌ریوان ئه‌هاتنه‌وه‌. ئه‌بووبه‌کر بۆ کاری دوکتۆر و ئه‌و دوو که‌سه‌ش بۆ سه‌ندنی ماشین بۆ سه‌فه‌ر چووبوون.

له‌م  ڕووداوه‌دا ته‌نها ناسر مه‌حموودی به‌ زیندوویی ده‌رچوو و که‌ ئه‌مه‌ی خواره‌وه‌ گێڕانه‌وه‌ ڕووداوه‌که‌یه‌ له‌ زاری ناسره‌وه‌:

ئێمه‌ کاتژمێر ۶:۳۰ ی شه‌و له‌ بۆکانه‌وه‌ ڕێکه‌وتین. ده‌ورو به‌ری کاتژمێر ۱۱:۳۰ بوو که‌ نزیک مه‌ریوان که‌وتینه‌وه‌. له‌ مه‌یدانی سپای مه‌ریوان پژۆیه‌کی "جی ئڵ ئیکس" به‌ پلاکی شه‌خسیه‌وه‌ وه‌ستابوو. شۆفیری پژۆکه‌ به‌ په‌نجه‌ی ده‌ست ئیشاره‌ی کرد که‌ ڕاوه‌ستین. ئه‌بووبه‌کر شۆفیر بوو له‌ سه‌ر ماشینه‌که‌ی ئێمه‌، ئه‌و وتی ئه‌وه‌ ماشینی شه‌خسیه‌ له‌وانه‌یه‌ چه‌ته‌ یان شتێکی تر بێت  پێویست ناکات بوه‌ستین، بۆیه‌ له‌وێدا نه‌وه‌ستاین و  گوێمان به‌ ئیشاره‌که‌ی ئه‌و نه‌دا. پژۆکه‌ که‌وته‌ شوێن ئێمه‌ به‌ ناو بازاڕدا نزیکه‌ی ته‌رمیناڵی سنه‌  یه‌کێ له‌وانه‌ که‌ له‌ ناو پژۆکه‌دا بوو ته‌قه‌یه‌کی به‌ره‌و ئاسمان کرد. ئێمه‌ زۆر سه‌رمان سووڕ ما، نه‌مان ئه‌زانی بۆچی ته‌قه‌ ئه‌که‌ن ‌، ئاخر ئێمه‌ هیچ بارێک یان شتێکی قاچاخمان پێ نه‌بوو. هه‌ر چه‌ند چرکه‌ی نه‌برد که‌ ئه‌و پژۆ هاته‌ ته‌نیشت ماشینه‌که‌ی ئێمه‌و  له‌ که‌نارمانه‌وه‌ ئێمه‌ی دایه‌ به‌ر ده‌ستڕێژی گوله‌، من ئه‌وه‌نده‌ فریا که‌وتم قاچ له‌ سه‌ر تورموز دانێم که‌ له‌ ژێر قاچی ئه‌بووبه‌کردا هاتبوه‌ سه‌رێ، ئه‌بووبه‌کر قاچی خستبوه‌ سه‌ر تورموز و ئه‌یوست بوه‌ستێ. هه‌ر له‌ جێدا ئه‌بووبه‌کر و که‌مال گیانیان له‌ ده‌ست دا، من نه‌مئه‌زانی چی بکه‌م دوو ته‌رم له‌ملاولامه‌وه‌ که‌وتبوون و له‌و لاشه‌وه‌ ته‌قه‌که‌ره‌کان هه‌ڕه‌شه‌یان لێ ئه‌کردم که‌ له‌ ماشینه‌که‌ دانه‌بزی تاکوو خۆمان ئیزنت ئه‌ده‌ین. پاش تۆزێک چه‌ن ماشینی سپایی گه‌یشتنه‌ ئه‌وێ و ته‌رمه‌کانیان به‌ره‌و نه‌خۆشخانه‌ برد و منیشیان برد بۆ ئیتیلاعاتی سپا بۆ لێپرسینه‌وه‌.

به‌ هه‌زار گێچه‌ڵ به‌ریان دام به‌ڵام ئێستاش هه‌ر باوه‌ڕ به‌ ڕووداوه‌ ناکه‌م وا ئه‌زانم خه‌وێکی ناخۆش ئه‌بینم.

هه‌ندێ وێنه‌ی ئه‌و تراژدیه‌ تاڵه‌:

کوژرانی 2 که‌س له‌ مه‌ریوان به‌ ده‌س سوپای پاسداران

1386/5/29

ئه‌مڕۆ یه‌کشه‌ممه‌ 19 ئاگۆستی 2007 دوو که‌س له‌ به‌رده‌سرێژی سوپای پاسداران بۆ ماشینه‌که‌یان له‌ مه‌ریوان کوژران.
ئه‌م ڕووداوه که‌‌ له‌ نزیک پۆمپ به‌نزینی ڕه‌حمان زه‌مانه‌ له‌ مه‌ریوان ڕووی داوه‌، که‌ تیایدا سوپای پاسدارانی ڕژێمی ئێران له‌ ماشینێکی باری که‌ سێ که‌سی به‌ ناوی 1- ئه‌بووبه‌کر دێهوه‌ند 2- که‌ماڵ مه‌حمودی 3- ناسر مه‌حمودی تێدا بوه‌ ماشکووک بوه‌ و ته‌قه‌ی له‌ ماشینه‌که‌ کردوه‌. که‌ له‌م ڕووداوه‌ ئه‌بووبه‌کر دێهوه‌ند و که‌ماڵ مه‌حمودی کوژراون و ناسر مه‌حمودی بریندار بوه‌ که‌ بێ سه‌ر و شوێنه‌.

راگەیاندراوی ژمارە 6ی کۆمتەی هاوبەش

1386/5/10

بۆ رای گشتی و هەموو ناوەندە مافپارێزەکانی جیهان 

پاش دوو هەفتە لە بڵاو بوونەوەی سزای قیزەونی لە سێدارەدان بۆ چالاکڤانان عەدنان حەسەنپوور و هیوا بووتیمار، لە ئاکامدا وتە بێژی دەزگای دادوەریی دەسەڵاتدارانی ئێران هاتە گۆ و ئەو سزایەی پشتڕاست کردەوە.

 

هاوکات لەگەڵ ئەو پشتڕاست کردنەوەیەدا، هێندێک قسە و هەڵوێست لە لایەن دەسەڵاتی ئێران و کەسانێکەوە دەبیسترێن کە جێگای تێڕامان و وردبوونەوەن.

 

ئەو هەواڵانە ئاماژە بە کۆمەڵێک تاوان و کردەوەی نافەرهەنگی و نارۆژنامەوانی دەکەن و بەڵگەشیان بۆ ئەو کردەوانە، دان پێدانانەکانی عەدنان و هیوایە لە گرتووخانەکانی دەسەڵاتی ئیسلامیدا.

 

وەبیر هێنانەوەی ئەم راستییە لێرەدا پێویستە کە کۆماری ئیسلامیی ئێران هەر لە سەرەتای دەسەڵاتداریی خۆیەوە، تا ئەمڕۆ لە بەریانێکی نەبڕاوە و گەڵاڵە کراو دا، هەر هەموو جیابیران و رەخنەگران و چالاکانی بوارە جۆراوجۆرەکانی ، لە ژێر ئازار و ئەشکەنجە دا ناچار کردووە دان بە تاوانی نەکردە دا بنێن.

 ئەم پرۆسەیە بە رادەیەک لای کارگێڕانی ئێران بەهای پێ دراوە و چەند پات بۆتەوە کە بۆیان بووە بە باوەڕ و قەناعەت و وادەزانن ئەم رەوتە سەراپا درۆ و دەلەسەیە راستە.

مێژووی دەسەڵاتی ئێران لە رووبەڕوو بوونەوە لەگەڵ جیابیران و رەخنەگراندا مێژوویەکی روون و ئاشکرایە و بۆ هەموو کەس و لایەنەکان ناسراو و ریسوایە.

 

ئەوە کام رۆژنامە نووس و چالاک و رەخنەگرە کە پێی کەوتبێتە بەندیخانەکانی ئێران و بە دژە شۆڕش و سیخوڕ و رووخێنەر ناوزەد نەکرابێ و خۆشی لە نمایشە تەلەفزیۆنییەکاندا بە رواڵەت ئەمانەی نەسەلماندبێ. سیناریۆکانی ئایەتوڵڵا شەریعەتمەداری و ئەمیر ئینتیزام و پەلاماردانی مونتەزیری و سیماکانی هاوبەشی دەسەڵاتی خۆیان تا دەگاتە هێزە سیاسییەکان و کەسانی رووناکبیر و چالاک وەک سەعید سیرجانی، سیامەک پورزەند، عەلی ئەفشاری، و لەم دواییانەشدا رامین جەهانبەگلوو و هالە ئیسفەندیاری و ...زسەلمێنەری ئەو راستییەن.

 

بە پێی ئەم راستییانە و واقیعی ئەو زنجیرە نمایشەی کە دەسەڵاتدارانی ئێران، وەک "ئیعتراف" باسی لێ دەکەن، بێگومان ئیعترافەکانی عەدنان و هیواش دەچنە خانەی ئەو نمایشانەوە.

 

بۆیە رادەگەیەنین کە ئەو تاوانە دەسکردانە هیچ نرخ و بەهایەکییان نییە و ناتوان ببنە بەڵگە و دیکیۆمێنتی پەسەندی یاسایی.

 

هەروەها بۆ روون بوونەوەی رای جیهانی دەڵێین کە لیستی کەلو پەلە دەست بە سەرداگیراوەکانی عەدنان لە بەر دەستە و بە زوویی بڵاوی دەکەینەوە . جگە لەوانە هەر شتێکی تر کە درابێتە پاڵ عەدنان درۆیە ودەسەڵات بۆ تەواو کردنی سیاریۆکەی خۆی ئەو کارە دەکات.

  

کۆمیته‌ی هاوبه‌شی پشتگیری کردن له‌ عه‌دنان حه‌سه‌ن پور وهیوا بوتیمار

 

له‌یلی حه‌سه‌ن پوور وته‌ بێژی کۆمیته‌ی هاوبه‌ش

 

•        کانونی نوسه‌رانی کوردستانی ئێران

 

•        رێکخراوی چاک

 

•        ناوه‌ندی خۆرهه‌ڵاتی نوێ بۆ دیموکراسی

 

•        رێکخراوی مافی مرۆڤی کوردستان

 

•        کۆمیته‌ پارێزگاری له‌ به‌ندکراوانی سیاسی کوردستان

   

k_pshtiwani@yahoo.com

  

adnanhasanpoor@yahoo.com

  

kempainp@yahoo.com

با به‌رامبه‌ر شه‌پۆلی نوێی سه‌رکوت و له‌ سێداره‌دان بێده‌نگ نه‌بین

1386/5/10

گه‌ر فریا نه‌که‌وین شه‌پۆلی له‌ سێداره‌دانی ڕۆژنامه‌وانان و چالاکانی مه‌ده‌نی ده‌ست پێ ئه‌کات.

کاتێ که‌ چالاکڤانی بواری مه‌ده‌نی "هیوا بووتیمار" و پاش مانگێکیش ڕۆژنامه‌وان "عه‌دنان حه‌سه‌ن پوور" ده‌ستگیر کران له‌ گه‌ڵ هه‌موو ناڕه‌حه‌تیه‌کدا، پێمان وابوو دوای ماوه‌یه‌کی که‌م ئازاد ئه‌کرێن. وه‌کوو ئاوی خواردن شه‌ش- حه‌وت مانگ له‌ زیندان هێڵنرانه‌وه‌. له‌وه‌ ئاسانتریش ئه‌وه‌ بوو که‌ له‌ نه‌بوونی پارێزه‌ره‌کانیاندا دادگایی کران.

ڕۆژی شه‌ممه‌، ۲۳ی پووشپه‌ڕ له‌ ژێر بارێکی ئه‌منی توندو تۆڵدا بۆ شاری سنه‌ (به‌ وته‌ی به‌رپرسی به‌ندیخانه‌ی مه‌ریوان) گوێزرانه‌وه‌.                                                                                               ڕۆژی سێشه‌ممه‌،۲۶ ی پووشپه‌ڕ له‌ لایه‌ن دادوه‌ر سوڵتان به‌خش، دادوه‌ری دادگای ئینقلابی مه‌ریوانه‌وه‌، حوکمی له‌ سێداره‌دان بۆ ئه‌م دوو چالاکڤانه‌ ده‌رچوو. ئه‌وه‌تا ئێسته‌ "قوه‌ قضائیه" ش ئه‌و حوکمه‌ی مۆر کردوه‌.

وه‌ک ئه‌بینین زۆر ئاسان بوو چیرۆکی له‌ ناو بردنی دوو که‌س. چیرۆکی  دوو که‌س که‌ ئه‌یانویست له‌ ڕێگه‌ی قه‌ڵه‌مه‌کانیانه‌وه‌ ده‌ردی میله‌ته‌که‌یان ده‌ربخه‌ن و گرفتی کۆمه‌ڵگاکه‌یان چاره‌سه‌ر بکه‌ن، له‌ چه‌ن دێڕدادوایی هات.‌ به‌ڵام ئه‌مه‌ ته‌نها له‌ سێداره‌دانی دوو که‌س نیه‌، ئه‌مه‌ ده‌ستپێکی تراژدیایه‌کی تاڵی ژینۆسایدی بیره‌ ئازاده‌کانه‌. له‌ سێداره‌دانی ئه‌م دوو که‌سه‌ واته‌ هێرش کردنه‌ سه‌ر که‌سێتی و بوونی نه‌ته‌وه‌یه‌ک که‌ به‌ پێچيوانه‌ی داگیرکه‌رانیه‌وه‌ هیچ کات نه‌ویستوه‌ له‌ ڕێگه‌ی ترساندن و تۆقاندنه‌وه قسه‌ی خۆی بسه‌لمێنێت.

بۆ دژایه‌تی کردن له‌ گه‌ڵ حوکمی له‌ سێداره‌دانی ئه‌م دوو که‌سه‌ له‌ ئاستی دنیاو له‌ ناو خۆی وڵاتیشدا کار زۆر کرا. که‌مپه‌ین دروست کرا، خۆپیشاندان کرا،نامه‌گه‌لێکی زۆر نووسرا، به‌رپرسه‌ جۆراوجۆره‌کان و خه‌ڵکانێکی زۆر ئاگادار کرانه‌وه‌ و .....                                                                                      به‌ڵام ‌ئایا ئه‌و دیکتاتۆره‌ی له‌ گه‌ڵ ئێمه‌دا به‌شه‌ڕ هاتوه‌، له‌و زمانانه‌ تێئه‌گات؟

- ئایا ئه‌و سیسته‌مه‌ ئێمه‌ له‌ گه‌ڵی مامه‌ڵه‌ ده‌که‌ین گوێگره‌ بۆ ده‌نگه‌ ناڕه‌زاکانی هه‌موو دونیا؟

- ئایا ئه‌م سیسته‌مه‌و ئه‌م ده‌سه‌ڵاته‌ زمانی وتوێژ تێ ئه‌گات؟

- ئه‌گه‌ر سه‌یری مێژوو بکه‌ین په‌یدا کردنی وه‌ڵامی هه‌موو ئه‌م پرسیارانه‌ زۆر ئاسانه‌.

به‌ کورتی به‌ کوردی ئه‌گه‌ر هه‌ڵوێستی جیدی نه‌گرین، ئه‌گه‌ر ناڕه‌زایه‌تیمان نه‌هێنینه‌ مه‌یدانی کرده‌وه‌وه‌، له‌ سێداره‌دانی دوو چالاکڤان هیچ خاڵێکی ڕه‌ش به‌ مێژووی ده‌سه‌ڵاتی سه‌پێندراو زیاد ناکات. با ئه‌وه‌ش بڵێم که‌ به‌رپرسیاره‌تی ئه‌م تراژدیه‌ به‌ ته‌نها ناخرێته‌ ئه‌ستۆی بکه‌ری ئه‌م حوکمه‌. هه‌وڵدان بۆ عه‌مه‌لی نه‌کردنی ئه‌م حوکمه‌ جیا له‌وه‌ی ئه‌رکی سه‌ر شانی هه‌موو نه‌ته‌وه‌که‌مانه‌ بێ پێوه‌ندیش نیه‌ به‌ گه‌له‌کهانی دراوسێوه‌، به‌ تایبه‌ت گه‌لی فارس که‌ هاواری دیموکراسی خوازیان به چه‌پ و به‌ ڕاسته‌وه‌ ده‌گاته‌ هه‌موو دونیا.‌

به‌ ڕای من ئیمزا کۆکردنه‌وه‌ ئیتر که‌ڵکی نه‌ماوه‌. سیسته‌می دانه‌رو بکه‌ری ئه‌م حوکمه‌ سه‌وادی خوێندنه‌وه‌ی ئیمزای نیه‌. ئیمزا ئه‌بێ له‌ سه‌ر شه‌قام بکرێت . که‌مپه‌ین یانێ کۆ بوونه‌وه‌ له‌ به‌ر ده‌رکی بینای دادگا. خۆپێشاندان له‌ پاریس و له‌نده‌ن و ستۆکۆڵم چاره‌سه‌ر نیه‌، خۆپیشاندان ئه‌بێ له‌و شوێنه‌ی بکرێت که‌ حوکمی تیا ده‌رکراوه‌.

راگه‌یاندراوی ژماره ‌5عه‌دنان حه‌سه‌ن پور و هیوا بوتیمار بێ سه‌ر وشۆێنن

 1386/5/8

راگه‌یاندراوی ژماره‌5/ عه‌دنان حه‌سه‌ن پور و هیوا بوتیمار بێ سه‌ر وشۆێنن

 كۆمیته‌ی هاوبه‌شی پشتگیری كردن له‌ عه‌دنان حه‌سه‌ن پور وهیوا بوتیمار

خه‌ڵكی ئازادیخواز و لایه‌نگرانی مافی مرۆڤ!

ئه‌وه‌ پتر له‌ دو هه‌فته‌یه‌ حوكمی له‌ سێداره‌دان بۆ رۆژنامه‌ نوس عه‌دنان حه‌سه‌ن پور و چالاكی مه‌ده‌نی هیوا بو تیمار له‌لایه‌ن داگای شۆرشی ئیسلامی شاری مه‌ریوانه‌وه‌، براوه‌ته‌وه‌ و هه‌ر له‌ یه‌كه‌م ساته‌كانی ده‌رچوونی ئه‌م حوكمه‌ ناڕه‌وایه‌دا،‌ هه‌مو ئازادیخوازان و ئینسان دۆستانی جیهان به‌ گشتی و خه‌ڵكی مرۆڤدۆستی كوردستان به‌ تایبه‌تی چ وه‌ك تاك و چ وه‌ك رێكخراوه‌ و ناوه‌ند، كه‌وتنه‌ ئیدانه‌ كردنی ئه‌م بریاره‌ ناره‌وایه‌ و داوای هه‌ڵوه‌شانه‌وه‌ و ئازادی ئه‌م دوچالاكه‌ كورده‌یان كرد و ئه‌م هه‌ڵمه‌ته‌ تا هه‌نوكه‌ش به‌ شێوه‌یه‌كی گشتگیر و به‌ربڵاو به‌رده‌وامه‌.

ئه‌وه‌ی كه‌ جێگای نیگه‌رانیی زیاتری هه‌مو مرۆڤدۆستان و لایه‌نگرانی ئازادی و به‌ تایبه‌تی جیگای نیگه‌رانیی بنه‌ماڵه‌ی عه‌دنان و هیوایه‌، بێ سه‌ر وشوێن بوونی كوڕه‌كانیانه‌ كه‌ هه‌ر پێش دوو رۆژ به‌ر له‌ ده‌رچوونی حوكمی له‌سێداره‌دان بۆ ئه‌وان و راگواستنیان له‌ به‌ندیخانه‌ی گشتی مه‌ریوان تا ئه‌ مڕۆكه‌ هیچ هه‌واڵێكیان له‌ شوێنی زیندانی وهه‌ر وه‌ها سه‌لامه‌تی و ته‌ندروستی ناوبراوان نیه‌.

ئێمه‌ وه‌ك كۆمیته‌ی هاوبه‌شی پشتگیری له‌ عه‌دنان حه‌سه‌ن پور و هیوا بوتیمار وێڕای دوباره‌ شه‌رمه‌زاركردنی حوكمی له‌ سێداره‌دان بۆ ئه‌م دو چالاكه‌ كورده،‌ سیاسه‌تی دورخستنه‌وه‌ و شاردنه‌وه‌ی زیندانیانی كورد بۆ شۆینی نادیار و رێگا نه‌دان به‌ پارێزه‌ر و بنه‌ماڵه‌كانیان بۆ بینینی رۆڵه‌كانیان به‌ توندی مه‌حكوم ده‌كه‌ین و داوا له‌ هه‌مو به‌شه‌ر دۆستان و لایه‌نه‌ پێوه‌ندیداره‌ كان ده‌كه‌ین كه‌ له‌ ئاست سیاسه‌تی نوێی ده سه ڵاتدارانی ئێران ده‌رهه‌ق به‌ به‌ند كراوان و چالاكانی فه‌رهه‌نگی، مه‌ده‌نی، رۆژنامه‌وانی و مافی مرۆڤ بێده‌نگ نه‌بن و به شێو ه‌یه‌كی مه‌ده‌نیانه به‌رهه‌ڵستی هه‌رچه‌شنه‌ كرده‌وه‌یه‌كی ئاوه‌ها ده‌رهه‌ق به‌ به‌ندكراوان ببنه‌وه‌.

كۆمیته‌ی هاوبه‌شی پشتگیری له‌ عه‌دنان حه‌سه‌ن پور و هیوا بوتیمار

•        له‌یلی حه‌سه‌ن پوور وته‌ بێژی كۆمیته‌ی هاوبه‌ش

•        كانونی نوسه‌رانی كوردستانی ئێران

•        رێكخراوی چاك

•        ناوه‌ندی خۆرهه‌ڵاتی نوێ بۆ دیموكراسی

•        رێكخراوی مافی مرۆڤی كوردستان

•        كۆمیته‌ پارێزگاری له‌ به‌ندكراوانی سیاسی كوردستان

k_pshtiwani@yahoo.com

adnanhasanpoor@yahoo.com

kempainp@yahoo.com

ڕاگه‌یاندراوی 81 مافپه‌روه‌ری كورد

1386/5/6

هه‌شتاو یه‌ک مافپه‌روه‌ری كورد به‌ ده‌ركردنی راگه‌یاندراوێك بڕیاری له‌ سێداره‌دانی رۆژنامه‌نووسیسه‌ربه‌خۆ "عه‌دنان حه‌سه‌نپوور" و چالاكی مه‌ده‌نی "هیوا بووتیمار"یان مه‌حكووم كرد.

 

له‌ درێژه‌ی پشتیوانیی نێو خۆیی و جیهانی له‌ عه‌دنان حه‌سه‌نپوور و هیوا بوتیماربۆ پێشگرتن له‌ به‌ڕێوه‌ چوونی بڕیاری سێداره‌ بۆ ئه‌و دوو چالاكڤانه‌ كورده‌ 81 پارێزه‌ر و مافپه‌روه‌ری كورد به‌ ده‌ركردنی به‌یاننامه‌یه‌ك كه‌ وێه‌یه‌كی به‌ خۆرهه‌ڵات نیوز گه‌یشتووه‌، ئه‌و حوكمه‌یان به‌ توندی مه‌حكووم كردووه‌ .

ئازادبوونی گیراوه‌کانی دوێنێ

1386/5/2

بێهزاد کوردستان، هیوا نادری و دانیال ئیمانی که‌ دوێنێ شه‌و به‌ده‌ستی

 هێزه‌کانئ ئیتیلاعات ده‌ستگیر کرابوون، دوای ته‌واو بوونی مانگرتنه‌که‌ ،ئه‌مڕۆ ئازاد کران.

مانگرتنی خه‌ڵکی مه‌ریوان بۆ ناڕه‌زایه‌تی ده‌ربڕین به‌ حوکمی عه‌دنان و هیوا

1386/5/1

گرتنی هیوا نادری و بهزاد کوردستانی و دانیال ئیمانی

 1386/5/1

کاتژمێر 2ی شه‌وی ڕابردوو هێزه‌کانی ئیتیلاعاتی مه‌ریوان سێ که‌س له که‌سایه‌تییه‌ فه‌رهه‌نگییه‌کانی مه‌ریوانیان ده‌سبه‌سه‌ر کرد. "هیوا نادری"، شاعیرو نووسه‌ر، بهزاد کوردستانی، شاعر و دانیال ئیمانی ئه‌و سێ که‌سه‌ن که‌ ده‌سبه‌سه‌ر کراون و هێشتا ڕوون نه‌بوه‌ته‌وه‌ که‌ هۆکاری گرتنیان چی بوه‌!‌

بۆ ده‌ربڕینی ناڕه‌زایه‌تی

1386/4/30

هه‌ر وه‌ک ئه‌زانین له‌م ڕۆژانه‌دا له‌ لایه‌ن دادگای ئینقلابی شاری مه‌ریوانه‌وه‌ حوکمی له‌ سێداره‌دانی ڕۆژنامه‌ نووس عه‌دنان حه‌سه‌ن پوور و چالاکی مه‌ده‌نی هیوا بووتیمار ده‌رکراوه‌. هه‌موان ئه‌زانین که‌ ئه‌م حوکمه‌، حوکمێکی ناعادلانه‌یه‌ که‌ به‌ سه‌ر ئه‌م دوو که‌سه‌دا سه‌پێندراوه‌. بۆیه‌ بۆ ده‌ربڕینی ناڕه‌زایه‌تی به‌ نیسبه‌ت ئه‌م حوکمه‌وه‌ ڕۆژی دووشه‌مه‌ ۱ گه‌لاوێژ به‌ داخستنی دووکانه‌کانمان و نه‌هاتنه‌ ده‌ره‌وه‌ له‌ ماڵه‌وه ‌کاری ڕۆژانه‌ی خۆمان ئه‌وه‌ستێنین.
ده‌ربڕینی ناڕه‌زایه‌تی به‌م حوکمه‌ مافی هه‌موومانه‌و به‌شداری کردن له‌م هه‌ڵوێسته‌داشدا ئه‌رکی سه‌ر شانمانه‌. 

هیوا بووتیمار و عه‌دنانی حه‌سه‌ن پوور بڕیاری له‌ سێداره‌دانیان بۆ ده‌رکرا

 1386/4/27

هیوا بووتیمار چالاکی بواری فه‌رهه‌نگی و ڕۆشنبیری له‌ لایه‌ن دادگای شۆڕشی مه‌ریوانه‌وه‌ بڕیاری له‌ سێداره‌دانی به‌ سه‌ردا سه‌پێندرا ئه‌مه‌ ی خواره‌وه‌ کورته‌یه‌ک له‌ حوکمی ناوبراوه‌؛

به‌ پێی ئه‌وه‌ی که‌ بووتیمار که‌ل و په‌لێکی زۆر وه‌کوو؛ ۶۰۰ دانه‌ نه‌واری ڤیدیۆ، ۲۴ دانه‌ سی دی، ئه‌ژمارێکی زۆری وێنه‌ و جێ کلیدی ئاڵای کوردستان و تابلۆی ئاڵای کوردستان و ... له‌ ناو ماڵی هێنراوه‌ته‌وه‌ ده‌رێ و هه‌ر وه‌ها به‌ چه‌ندین جار سنووری ئێران - ئێراقی به‌زاندوه‌و له‌م ڕێگانه‌وه هه‌وڵی ڕووخاندنی ڕژێمی کۆماری ئیسلامی داوه‌‌، دادگای شۆڕشی شاری مه‌ریوان حوکمی له‌ سێداره‌دان بۆ ناو براو ده‌رئه‌کات.

هه‌روه‌ها عه‌دنان حه‌سه‌ن پوور ڕۆژنامه‌وانی مه‌ریوانی، له‌ لایه‌ن دادگای شۆڕشی شاری مه‌ریوانه‌وه‌ هه‌مان حوکمی به‌ سه‌ردا سه‌پێندرا.

شایانی باسه‌ قازی هه‌ردوو په‌روه‌نده‌ بۆ ئه‌م حوکمه‌ هه‌ندێ شتی به‌ به‌ڵگه‌ هانیوه‌ته‌وه‌ که‌ هیچ پێوه‌ندیه‌کی به‌ مه‌سه‌له‌که‌وه‌ نیه‌. بۆ نموونه‌ له‌ حوکمه‌ی حه‌سه‌ن پوور دا هاتوه‌ که‌ ناوبراو خزمی پله‌ یه‌کی له‌ باشووری کوردستان ئه‌ژی، یان ئه‌وه‌ی که‌ هه‌ڵبژاردنی بایکوت کردوه‌ و... هه‌روه‌ها له‌ حوکمه‌که‌ی بووتیماریشدا هاتوه‌ که‌ برایه‌کی ئه‌و له‌ هه‌نده‌ران ئه‌ژی و سه‌ربه‌ حزبه‌ ئۆپۆزۆسیۆنه‌کانه‌ بۆیه‌ براکه‌شی له‌وانه‌یه‌ هاوکاری کردبێت له‌ گه‌ڵیا، یان ئه‌وه‌ی که‌ بووتیمار سیم کارتی عه‌راقی هه‌یه‌ و کۆمه‌ڵێ شتی تر، که‌ هیچ پێوه‌ندیه‌کی به‌و حوکمه‌وه‌ نیه‌.

حوکمی ئه‌م دوو که‌سه‌ به‌ شێوه‌ی ڕه‌سمی ئه‌مڕۆ گه‌یشتوه‌ به‌ ده‌ستی بنه‌ماڵه‌و پارێزه‌ره‌کانیان و له‌ ئاخری حوکمه‌که‌دا هاتوه‌ که‌ بۆ ناڕه‌زایه‌تی ده‌ربڕین به‌م حوکمه‌ ۳ حه‌فته‌ واته‌ ۲۱ ڕۆژ ده‌رفه‌ت هه‌یه‌.

ئاگادارییه‌ک و شه‌ش هه‌ڵه‌

 1386/3/29

(به‌ داخه‌وه‌ وێنه‌ی ئاگادارییه‌که‌ فه‌وتاوه‌)

ئه‌م ئاگاداریه‌، ئاگاداری ناوه‌ندی که‌لتووری-هونه‌ریی ڤه‌ژینه‌. که‌ ئه‌مه‌ نووسینه‌یه‌م بینی هه‌ستم به‌ هه‌ندێ هه‌ڵه‌ کرد، بۆیه‌ به‌ مه‌به‌ستی به‌ره‌و باشتر چوونی نووسینه‌ی کوردی ئه‌و هه‌ڵانه‌ لێره‌دا ده‌رئه‌خه‌م.

وشه‌ی "هونه‌ری" کاتێ بمانه‌وێ پێوه‌ندی بده‌ین به‌ وشه‌ی پاش خۆیه‌وه‌ پێویسته‌ "ی" ی نیسبی به‌ کار بێنین واته‌ ئه‌بوایه‌ بنووسرایه‌، "... هونه‌ریی ڤه‌ژین..."                                                                  "هاوین تان" هه‌ڵه‌یه‌، ئه‌بوایه‌ بنووسرایه‌ "هاوینتان" واته‌ به‌سه‌ر یه‌که‌وه‌ بوایه‌ت. چونکه‌ "تان" جێناو(ضمیر)ه‌و له‌ ڕێزمانی کوردیشا جێناو ئه‌لکێت به‌ وشه‌ی پێش خۆیه‌وه‌.                                                 "...خولی فێرکاری زمانی کوردی..."، لێره‌شدا دیسان "ی" ی نیسبی دانه‌نراوه‌، ئه‌بوایه‌ بنووسرایه‌ "...خولی فێرکاریی زمانی کوردی...". له‌ دوای ئه‌وه‌ش ئێمه‌ شتێک به‌ ناو زمانی کوردی لاتینمان نیه‌، به‌ڵکوو  ڕێنووسی لاتین (یان ئارامی) مان هه‌یه‌. که‌وایه‌ ئه‌بوایه‌ بنووسرایه‌ "...خولی فێرکاری زمانی کوردی به‌ ڕێنووسی لاتین...".  کۆ کردنه‌وه‌ی دوو وشه‌ی "هاوشاریان" و "به‌شداران" کۆ کردنه‌وه‌یه‌کی دروست نیه‌. هاوشاریان ئه‌توانێ هه‌مان به‌شداربووان بن. ڕسته‌که‌ ئاوایه‌ "...له‌ هاوشاریان و به‌شدارانی به‌ڕێز داوا ده‌که‌ین .... بۆ به‌شدار بوون له‌..."، واته‌ ئه‌وانه‌ش که‌ که‌ به‌شدارن بۆ به‌شدار بوون ئه‌بێ سه‌ردانی ناوه‌ندی ناوبراو بکه‌ن.                   نووسراوه‌ "... تا ڕۆژی 15 پووشپه‌ڕ..." دیسان "ی"ی نیسبی له‌ بیر چوه‌ "... تا ڕۆژی 15 ی پووشپه‌ڕ..." دروسته.     

بۆچی له‌ جێگای "ساعه‌ت" نه‌نووسراوه‌ " کاتژمێر"؟ وا ئه‌زانم لانی که‌م له‌م وشه‌یه‌دا موحتاجی ئه‌ده‌بیاتی بێگانه‌ نابین.

هیوادارم براده‌رانی به‌ڕێوه‌به‌ری ڤه‌ژین ئه‌م پۆسته‌م وه‌کوو ڕه‌خنه‌یه‌ک له‌ به‌رچاو بگرن.‌                                                                    

پۆلی فێرکاری زمان و وێژه‌ی کوردی

1386/3/25

ئه‌نجومه‌نی فه‌رهه‌نگی- ئه‌ده‌بیی مه‌ریوان هه‌موو ساڵێک له‌ وه‌رزی هاوینداو هه‌ندێ جاریش له‌ وه‌رزه‌کانی تردا خولی فێرکاری زمانی کوردی به‌ڕێوه‌ ده‌بات. له‌م خولانه‌دا که‌ به‌ زۆری ۳ یا ۴ پۆلن، پۆلی مناڵان و گه‌وره‌کان جیا ئه‌کرێته‌وه‌.(شایانی باسه‌ ساڵی پێشوو پۆلی مناڵان له‌ لایه‌ن ئیرشاد ئیسلامیه‌وه‌ به‌ری پێگیراو که‌نسڵ کرایه‌وه‌). دوو جۆر نامیلکه‌ بۆ مناڵان و گه‌وره‌کان ئاماده‌ ئه‌کرێت. ئه‌نجومه‌نی ئه‌ده‌بی جیا له‌ ده‌فته‌ری خۆی له‌ شوێنی تریش بۆ مناڵانه‌ی که‌ ماڵیان دووره‌ له‌ ده‌فته‌ری ئه‌نجومه‌ن پۆلی فێرکاری به‌ڕێوه‌ ده‌بات که‌ یه‌ک له‌و شوێنانه‌ بینای فه‌رهه‌نگسه‌رای مه‌ریوانه‌.

ئه‌نجومه‌ن ئه‌ده‌بی ئه‌مساڵ بۆ زیاتر هاندانی خه‌ڵک له‌ به‌شداری کردنی ئه‌م خولانه‌دا که‌ڵکی له‌م ڕستانه‌ی خواره‌وه‌ وه‌رگرتوه‌:

(به‌ داخه‌وه‌ وێنه‌کانی ئه‌م پۆسته‌ فه‌وتاوه‌)

 

ڕستانه‌ له‌ ئه‌ژمارێکی زۆردا چاپ کراوه‌و له‌ هه‌موو شه‌قامه‌ گرینگه‌کانی شاردا داکوتراوه‌و بڵاو کراوه‌ته‌وه‌.

شایانی باسه‌ ئه‌نجومه‌نی فه‌رهه‌نگی- ئه‌ده‌بیی مه‌ریوان هه‌موو ساڵێک زیاتر له‌ ۵۰ تا ۷۰ مناڵ و مێر منداڵی مه‌ریوانی فێری خوێندن و نووسینی زمانی کوردی به‌ شێوه‌ی زانستی ئه‌کات.

کۆبوونه‌وه‌ی گشتیی ناوه‌ندی که‌لتووری - هونه‌ری ڤه‌ژین

 1386/3/24

(به‌ داخه‌وه‌ وێنه‌کانی ئه‌م پۆسته‌ فه‌وتاوه‌)

ڕۆژی چوارشه‌ممه‌ ۲۳ ی جۆزه‌ردان ناوه‌ندی که‌لتووری- هونه‌ریی ڤه‌ژین به‌ ئاماده‌ بوونی ئه‌ندامانی ئه‌نجومه‌ن و که‌سانی تری فه‌رهه‌نگ و هونه‌ر دۆستی مه‌ریوانی کۆبوونه‌وه‌ی گشتیی به‌ڕێوه‌ برد.

له‌م کۆبوونه‌وه‌یه‌دا سه‌ره‌تا حه‌مه‌ی که‌ر‌یمی وه‌کوو نوێنه‌ری ده‌سته‌ی به‌ڕێوه‌به‌ری پێشوو، باسی ‌ مێژووی ڤه‌ژینی کردو کاره‌کانی ده‌سته‌ی به‌ڕێوه‌ به‌ری ڕابردووی خسته‌ به‌رده‌س ئاماده‌بوان. پاشان وتارێکی سه‌باره‌ت به‌ که‌م کووڕیه‌کانی ڤه‌ژینی خوێنده‌وه‌ که‌ تیایدا ئه‌مانه‌ی خواره‌وه‌ له‌ سه‌ره‌کیترین کێشه‌کان بوون:

-          نه‌بوونی کاره‌با 

-          نه‌بوونی ته‌له‌فوون

-          خراپی شوێنی ساختمانی ڤه‌ژین

-          لاواز بوونی کتێبخانه‌

پاشان هه‌ڵبژاردن ده‌ستی پێ کرد، که‌ له‌ هه‌ڵبژاردنه‌که‌دا ئه‌وانه‌ی خواره‌وه‌ وه‌کوو ده‌سته‌ی به‌ڕێوه‌به‌ری نوێ هه‌ڵبژێردران:

-          هیوا نادری

-          عه‌زیز ناسری

-          کامیل سه‌فه‌ری

-          مه‌زهه‌ر نووری

-          عیرفان حسه‌ینی

هه‌روه‌ها "که‌ژان ئه‌سه‌دی" وه‌کوو چاودێر هه‌ڵبژێردرا.

دادگایی "هیوا بووتیمار" له‌ نه‌بوونی پارێزه‌ره‌که‌یدا

1386/3/8

ئه‌مڕۆ ۸ ی جۆزه‌ردان هیوا بووتیمار زیندانی سیاسی کاتژمێر ۱۰ی به‌یانی له‌ زیندانی گشتیی مه‌ریوانه‌وه‌ برا بۆ دادگای ئینقلابی ئه‌و شاره‌. دادگایی ناوبراو کاتژمێر ۵/۱ ی پاش نیوه‌ڕۆ کۆتایی هات.

بووتیمار له‌ کاتێکدا دادگایی کرا که‌ پارێزه‌ره‌که‌ی واته‌ "حه‌مه‌ ساڵه‌ی نیکبه‌خت" له‌ دانیشتنی دادگایه‌که‌یدا نه‌بوو. نیکبه‌خت چه‌ن ڕۆژ پێشتر داخوازینامه‌یه‌کی بۆ به‌ڕێوه‌به‌ری دادگای ئیمقلاب ناردبوو که‌ دانیشتنی دادگایی بووتیمار بۆ حه‌فته‌ی داهاتوو دوا بخه‌ن، به‌ڵام دادگا ئینقلاب بێ گوێدان به‌ داخوازیه‌که‌ی پارێزه‌ری بووتیمار، به‌ گرتنی پارێزه‌ری ته‌سخیری (واته‌ پارێزه‌رێک که‌ خۆیان دیاری ئه‌که‌ن)، دانیشتنی دادگایی ناوبراویان به‌ڕێوه‌  برد.

شایانی باسه‌ بووتیمار له‌ کاتی هانینوو بردن له‌ به‌ندیخانه‌ی گشتیه‌وه‌ بۆ دادگا، جیا له‌وه‌ی که‌ ده‌ستی که‌له‌بچه‌ کرابوو به‌ مه‌ئموورێکه‌وه‌، هه‌ردوو قاچیشی به‌یه‌که‌وه‌ زنجیر کرابوو.

دامه‌زراندنی ئه‌نجومه‌نێکی فه‌رهه‌نگی- ئه‌ده‌بیی له‌ زانکۆی په‌یام نووری مه‌ریوان

 1386/3/7

(به‌ داخه‌وه‌ وێنه‌کانی ئه‌م پۆسته‌ فه‌وتاوه‌)

ئه‌مڕۆ یه‌کشه‌مه "۶" ی جۆزه‌ردان خوێندکارانی زانکۆی په‌یام نووری مه‌ریوان یه‌که‌م دانیشتنی ئه‌نجومه‌نی فه‌رهه‌نگی- ئه‌ده‌بیی "هۆزان" یان به‌ڕێوه‌ برد.

ئه‌م ئه‌نجومه‌نی به‌ یارمه‌تی هه‌ندێ چالاکڤانی که‌لتووری‌و خوێندکاره‌ ئه‌ده‌ب دۆسته‌کان، و به‌ هاوکاری ئه‌نجومه‌نی فه‌رهه‌نگی - ئه‌ده‌بیی‌ مه‌ریوان دامه‌زراوه‌. دانیشتنی ئه‌مڕۆ له‌ چوارچێوه‌ی کۆڕێکدا به‌ ڕێوه‌ چوو، به‌ڕێوه‌ به‌ری کۆڕه‌که‌ "سه‌لام نه‌باتی" بوو.  "ئارام ساڵحی" بۆ زیاتر ناساندنی ئه‌نجومه‌ن وتارێکی خوێنده‌وه‌ پاشان ئه‌مانه‌ی خواره‌وه‌ به‌ بابه‌تی خۆیانه‌وه‌ به‌شداری کۆڕه‌که‌یان کرد: 

                                

- هادی ڕه‌حمان زاده‌، کورته‌ وتارێک له‌ سه‌ر گیرو گرفته‌ کانی بزووتنه‌وه‌ی خوێندکاری به‌ گشتی و بزووتنه‌وه‌ی خوێندکاریی کوردی به‌ تایبه‌تی، هه‌ر وه‌ها خوێندنه‌وی شێعرێک.    

- تۆفێق...، به‌ نوێنه‌رایه‌تی ئه‌نجومه‌نه‌کانی دیکه‌ی زانکۆی په‌یام نووره‌و به‌خێرهاتن و پشتیوانی خۆیان بۆ ئه‌م ئه‌نجومه‌نه‌ تازه‌ ده‌ربڕی.

- ئه‌مین عه‌زیزی، وتارێک له‌ سه‌ر هه‌واڵ و ئه‌ده‌بیات.

- ڕه‌ووف مه‌حموود پوور، خوێندنه‌وه‌ی شێعرێک.

- شنۆ  ڕه‌حیمی، (له‌ ده‌سته‌ی دامه‌زرێنه‌ران)، خوێندنه‌وه‌ی شێعر.

- شه‌ریف مورادی، خوێندنه‌وه‌ی شێعر.

- هیوا نادری، خوێندنه‌وه‌ی شێعر (داهۆڵه‌کان).

- سروه‌ دانش په‌ژوو، خوێندنه‌وه‌ی دوو کورته‌ شێعر.   

- حه‌مه‌ی که‌ریمی، خوێندنه‌وه‌ی شێعر.

- هادی ته‌به‌ر زه‌د، (له‌ دامه‌زرێنه‌ران)، خوێندنه‌وه‌ی شێعر.

- عه‌زیز ناسری، خوێندنه‌وه‌ی شێعرێکی فارسی به‌ ناوی "غزل همکلاسی".

- په‌روین هه‌لاکۆ، دوو کورته‌ شێعر.

- ئه‌سعه‌د گوڵانی، خوێندنه‌وه‌ی شێعر.

- بیژه‌ن...، ژه‌ندنی تار.

پاش پێشکه‌شکردنی هه‌موو به‌رهه‌مه‌کان هه‌ڵبژاردنی ده‌سته‌ی به‌ڕێوه‌ به‌ری ئه‌نجومه‌ن ده‌ستی پێ کرد. وه‌کوو نه‌ریتی هه‌میشه‌یی ئه‌نجومه‌نه‌کان ده‌سته‌یه‌ک به‌ ناوی "هیئت رئیسه‌" جیا کرانه‌وه‌ بۆ به‌ڕێوه‌به‌رایه‌تی هه‌ڵبژاردنه‌که‌ که‌ ئه‌م چوار که‌سه‌ بوون:۱- ئه‌نوه‌ر ڕه‌وشه‌ن ۲- ڕه‌ووف مه‌حمود پوور ۳- عه‌زیز ناسری ۴- سه‌باح نیکخا.

ئه‌ژمارێک له‌ خوێندکاران خۆیان کاندید کرد بۆ ده‌سته‌ی به‌ڕێوه‌به‌ر، که‌ له‌وانه‌ ئه‌مانه‌ی خواره‌وه‌ به‌ پێی هه‌ڵبژاردن وه‌کوو ده‌سته‌ی به‌ڕێوه‌ به‌ر هه‌ڵبژێردران:

۱-      عه‌تا دهقان

۲-     شه‌ریف مورادی

۳-      سۆیلا کیانی

۴-      ڕووناک به‌رته‌نی

۵-    په‌ره‌ستوو قادری

هه‌روه‌ها که‌سێکیش وه‌کوو بازڕه‌س هه‌ڵبژێردرا به‌ ناوی "عه‌لی زارعی".

ڕێکخستنی پرۆگرامی کێفپێوان له‌ لایه‌ن "ئه‌نجومه‌نی سه‌وزی چیا" وه‌

1386/3/4

 (به‌ داخه‌وه‌ وێنه‌کانی ئه‌م پۆسته‌ فه‌وتاوه‌)

 ئه‌مڕۆ هه‌ینی ۴ ی جۆزه‌ردان "ئه‌نجومه‌نی سه‌وزی چیا" له‌ هه‌ڵوێستێکی نمادین دا به‌ کۆکردنه‌وه‌ی ئه‌ژمارێک له‌ ژینگه‌ دۆستانی مه‌ریوان پرۆگرامێکی کێفپێوانی ڕیکخست. ژماره‌ی به‌شدار بوان ئه‌گه‌یشته‌ په‌نجا که‌س و کاتی ڕێکه‌وتنیان ۷ ی به‌یانی بوو.    

ئه‌و تیمه‌ له‌ داوێنی کێفی "قووچه‌لووس"ه‌وه سه‌رکه‌وتن، یاڵه‌کانی "سه‌ربان" یان تێپه‌ڕ کردو به‌ سه‌ر لووتکه‌ی "قووچی سوڵتان" دا هه‌ڵگه‌ڕان. له‌و لووتکه‌وه‌ که‌ که‌ زاڵه‌ به‌ سه‌ر سنووری باشماخ داو به‌شێک له‌ شارۆچکه‌ی پێنجوێن دیاره‌، گه‌ڕانه‌وه‌ به‌ره‌و خوارو له‌ ئاوایی "ساوا" ‌وه‌ هاتنه‌ خوارێ و له‌وێدا کۆتاییان به‌ پرۆگرامه‌که‌ هێنا.

ئه‌نجومه‌نی سه‌وزی چیا NGO یه‌که له‌ مه‌ریوان بۆ پاراستنی ژینگه‌و ڕاهێنانی خه‌ڵک به‌ که‌لتووری ژینگه‌ پارێزی. ئه‌م ئه‌نجومه‌ زیاتر له‌ ۵ ساڵه‌ کار ئه‌کات، هه‌رچه‌نده‌ به‌رپرسه‌کانی ئه‌م NGO چه‌ندین جار داخوازی مجه‌وه‌زی یاسایی یان له‌ فه‌رمانداری ئه‌و شاره‌ کردوه‌ به‌ڵام تا ئێسته‌ مجه‌وه‌زی پێویستیان پێ نه‌دراوه‌.‌‌

تیرباران کردنی 11 کوردو خه‌ڵاتی "جه‌هانگیر ڕه‌زمی"

1386/3/3

۲۷ی ئاگۆستی  ۱۹۷۹ (۵ی خه‌رمانانی ۱۳۵۸ ی هه‌تاوی)، فڕۆکه‌خانه‌ی شاری سنه‌. ۱۱ کورد له‌ به‌رده‌م تیرباران کردنی هێزه‌کانی سپای ئێران دان. سادقی خه‌لخالی حوکمی کوشتنی ئه‌م ۱۱ کورده‌ی ده‌رکردبوو. وێنه‌ گری ئه‌م وێنه‌یه‌ "جه‌هانگیر ڕه‌زمی" ه‌ که‌ ئه‌و کات وێنه‌ گری ڕۆژنامه‌ی ئیتلاعات بوه‌. ئه‌م وێنانه‌ له‌ گه‌ل هه‌ندێ وێنه‌ی ترا له‌ ڕۆژنامه‌ی ئیتلاعاتی ئه‌و کاتدا بڵاو بوه‌ته‌وه‌، به‌ڵام له‌ به‌ر مه‌ترسی ئه‌منی ناوی وێنگره‌که‌ی نانووسرێت. هه‌ر دوای ئه‌وه‌ ئاژانسی هه‌واڵنێری یۆنایتێد پرێس له‌ ئاستی دونیادا ئه‌م وێنانه‌ بڵاو ئه‌کاته‌وه‌.

پاش چه‌ند مانگ ئه‌م وێنه‌یه‌ خه‌ڵاتی پولیتزێر ی برده‌وه‌، که‌ به‌ناو بانگترین خه‌ڵاتی ڕۆژنامه‌ وانیه‌ له‌ ئه‌مریکادا و هه‌موو ساڵێک(له ‌ ۱۹۱۷ه‌وه‌) به‌ چاودێری زانکۆی کۆڵۆمبیا به‌ باشترین ڕۆژنامه‌وان ئه‌درێت.  ئه‌م ناوه‌نده‌ هه‌موو ساڵێک خه‌ڵاتی نیو میلیۆن دۆلاری ئه‌دا به‌و وێنانه‌ی که‌ به‌ باشترین وێنه‌ له‌ ئاستی دونیا دا بناسرێت. ناوه‌ندی پولیتزێر له‌ ساڵی ۱۹۸۰ خه‌ڵاتی خۆی دا به‌ وێنه‌گری وێنه‌ی تیرباران کردنی ئه‌و ۱۱ کورده‌. به‌ڵام که‌س وێنه‌گره‌که‌ی نه‌ئه‌ناسی و ڕه‌زمیش که‌ دواتر ببوه‌ وێنه‌گری بنه‌ماڵه‌ به‌رپرس و ئاخونده‌کانی کۆماری ئیسلامی، نه‌ی ئه‌وێرا ناوی خۆی ببات بۆ گرتنی ئه‌و خه‌ڵاته‌.بۆیه‌ ئه‌و وێنه‌یه‌ درا به‌ وێنه‌ گری بێ ناو نیشان.

له‌ ۲۰۰۶ و پاش ۲۷ ساڵ جه‌هانگیر ڕه‌زمی که‌ ئیتر نێوانی له‌ گه‌ڵ ده‌سه‌ڵاتی سیاسی کۆماری ئیسلامی خراپ ببوو و به‌ره‌و ڕۆژ ئاوا هه‌ڵاتبوو، بۆ یه‌که‌م جار  وه‌کوو خاوه‌نی ئه‌و وێنه‌یه‌ ناسرا‌. له‌ ۷ ی دیسامبێری ۲۰۰۶  لێژنه‌ی داوه‌ری خه‌ڵاته‌که‌ به‌ شێوه‌یه‌کی ڕه‌سمی ڕه‌زمی به‌ خاوه‌نی ئه‌م خه‌ڵاته‌ ‌ ڕاگه‌یاند. ڕه‌زمی که‌ ئێسته‌ ۵۸ ساڵیه‌تی سه‌باره‌ت به‌م وێنه‌یه‌ وتبووی، حه‌زم ئه‌کرد خه‌ڵک نه‌یزانیایه‌ت که‌ خاوه‌نی ئه‌و وێنه‌یه‌ کێیه‌و هه‌ر بێ ناو بمایه‌ته‌وه‌ چونکه‌ ئه‌و وێنه‌یه‌ ئه‌بێته‌ هۆی پڕوپاگه‌نده‌ی نگێتیڤ بۆ وڵاته‌که‌م.

 
                            له‌ ۱۶ی ئاگۆستی ۱۹۷۹ دا خومه‌ینی هه‌زاران سه‌ربازی بۆ کۆمه‌ڵکوژی خه‌ڵکی کوردستان نارد. ده‌ ڕۆژ دوای ئه‌وه‌ هه‌واڵ گه‌یی به‌ ڕۆژنامه‌ی ئیتیلاعات که‌ قازیه‌ک ئه‌یه‌وێت ۱۱ له‌و کورده‌ مرۆڤ کوژانه‌ دادگایی بکات. به‌هرامی که‌ ۲۲ ساڵ ڕۆژنامه‌وانی ڕۆژنامه‌ی ئیتیلاعات بوه‌، ئه‌و کات له‌ لایه‌ن ڕۆژنامه‌ی ئیتیلاعاته‌وه‌ نێردراوه‌ بۆ سنه‌ که‌ سه‌باره‌ت به‌و دادگاییه‌ ڕاپۆرتێک بنووسێت، ئه‌ویش وه‌ک وێنه‌ گر جه‌هانگیر ڕه‌زمی له‌ گه‌ڵ خۆی ده‌بات. به‌هرامی ئاوا باسی ئه‌و دادگایه‌ ئه‌کات: دادوه‌ر(خه‌لخالی) که‌ هات مێزه‌ره‌که‌ی له‌ سه‌ر لابرد، که‌وشه‌کانی داکه‌ندو له‌ پشت چاویلکه‌که‌یه‌وه‌ ناوی یه‌که‌ به‌ یه‌که‌ی گیراوه‌کانی پرسی، پاشان ئتهامه‌کانی خوێندنه‌وه‌؛ هه‌ڵگرتنی چه‌ک، هه‌وڵ بۆ ڕووخاندی ڕژێم، پیاوکوژی و......گیراوه‌کان ئه‌و طؤـيطآةيێآة ڕه‌د کرده‌وه‌. هیچ به‌ڵگه‌یه‌ک نه‌خرایه‌ ڕوو پاش ۳۰ خوله‌ک خه‌لخالی ئه‌و ۱۱ کورده‌ی به‌ "مفسدفی‌الارض" تۆمه‌ت بار کرد.                                                                                         

  "وال ئستریت ژورناڵ" که‌ ده‌ورێکی سه‌ره‌کی بوه‌ له‌ په‌یدا کردنی وێنه‌گری ئه‌م وێنه‌یه‌دا، وتارێکی له‌ ژێر ناوی "مێژووی وێنه‌یه‌کی دڵته‌زێن" له‌ کۆکردنه‌وه‌ی "جاشوا پریگر" نووسیوه‌ که‌ ئاوا باسی ئه‌م ڕووداوه‌ ئه‌کات: ڕه‌زمی له‌ گرتنی وێنه‌کان دا به‌ ته‌واوی ئازاد بوه‌، که‌ خه‌لخالی ئه‌و حوکمه‌ی ده‌رکردوه‌ به‌ند کراوه‌کان به‌ ده‌ست و چاوی به‌سترواوه‌وه‌ به‌ره‌و شوێنی جێبه‌جێ کردنی حوکمه‌که‌ ده‌ست له‌ سه‌ر شانی یه‌کتر ڕه‌وانه‌ کراون. ڕه‌زمی له‌ پێش ئه‌وانه‌وه‌ چوه‌ پاش به‌ند کراوه‌کانیش عه‌لی که‌ریمی یه‌ک له‌ پارێزه‌رانی خه‌لخالی(به‌ کراس و شه‌رواڵ و که‌وشی سپیه‌وه‌ ) تێپه‌ڕ بوه‌. که‌ریمی ئه‌ڵێ به‌ به‌ند کراوه‌کان ئاخرین وته‌ی خۆتان بڵێن جگه‌ له‌ یه‌کێ له‌وانه‌ که‌ وه‌ک ئه‌ڵێن نان فرۆش بوه‌ و هیچ کاره‌، ئه‌وانی تر هیچ ناڵێن. یه‌که‌م که‌س لای ڕاسته‌وه‌ ناسری سه‌لیمی بوو، ده‌ستی باند پێچی کرابوو، له‌ ڕۆژنامه‌کانی ئه‌و کاتی ئێراندا نووسیبوویان که‌ گوایه‌ سه‌لیمی له‌ خۆپیشاندانه‌کانی ناو شاری سنه‌ دا وای لێ هاتوه‌. خۆر له‌ پشتی به‌ند کراوه‌کانه‌و دائه‌چوو کاتژمێر چوارو نیو فه‌رمانی ته‌قه‌ درا. ۱۱ ته‌قه‌ کرا  ۱۱لاشه‌ له‌ عه‌رد دران. که‌ریمی سیلاحی که‌مه‌ری خۆی ده‌رهێنا، هه‌موویان نه‌مردبوون که‌ریمی به‌سه‌ر ئه‌حسه‌ن ناهید دا که‌ له‌ سه‌ر برانکارد بوو نووشتایه‌وه‌ فیشه‌کێکی له‌ سه‌ری ته‌قاند، هه‌روا درێژه‌ی پێدا تا نه‌فه‌ری ئاخر هه‌ر که‌سه‌وفیشه‌کێکی له‌ سه‌ری ته‌قاند.                                                                                

ڕه‌زمی ئه‌ڵێت پاش تیربارانه‌که‌و گرتنی هه‌موو وێنه‌کان ئامبوڵانسێک هات بۆ لابردنی مه‌یته‌کان، ئیتر بۆ من زۆر دره‌نگ بوو ئه‌بوایه‌ بڕۆشتمایه‌ته‌وه‌ بۆ تاران بۆ چاپ کردنی ئه‌م وێنانه‌، وه‌ختم نه‌بوو بمێنمه‌وه‌ بۆ دوه‌مین  دادگایی که‌ قه‌رار بوو بکرێت.

حه‌یده‌ری سه‌رده‌بیری ئه‌و کاتی ڕۆژنامه‌ی ئیتیلاعات ئاوا باسی ئه‌و وێنه‌یه‌ ئه‌کات: کاتێ خه‌ریکی ڕێک و پێک کردنی ڕۆژنامه‌که‌ بووم،  له‌ سه‌ر وێنه‌یه‌ک ماق بوومه‌وه‌، وێنه‌ی تیرباران کردنی کورده‌کان بوو له‌ کاتێکدا ته‌قه‌ ده‌ستی پێکردبوو هه‌ندێ له‌ تۆمه‌تباره‌کان که‌وتبوون و هه‌ندێکیش هێشتا به‌ پێوه‌ بوون. ئه‌مزانی که‌ مه‌سه‌له‌ی کورده‌کان ئێسته‌ له‌ ئێراندا باسی سه‌ره‌کیه‌ خه‌ڵک تامه‌زرۆی خوێندنه‌وه‌ی ئه‌م بابه‌تانه‌ن و بێزارن له‌ سانسۆر، بڕیارم دا چاپی که‌م به‌ڵام نه‌ک له‌و نوسخه‌یه‌دا که‌ بۆ کوردستان ئه‌ننێردرێت چونکه‌ ئه‌مزانی به‌ چاپ کردنی ئه‌م وێنه‌یه‌ بۆ کورده‌کان شه‌ڕ ده‌ست پێ ئه‌کات و منیش له‌ کار ده‌ر ئه‌کرام. هه‌ر وه‌ها ئه‌شمزانی چاپ کردنی ناوی جاهانگیر ڕه‌زمی به‌ قازانجی ته‌واو نابێت بۆیه‌ وێنه‌که‌م بێ ناو چاپ کرد.

ئه‌م وێنه‌یه‌ چاپ کرا، ده‌نگێکی هه‌ره‌ زۆری له‌ ڕۆژنامه‌کانی بیانی دا دایه‌وه‌، هه‌ر زوو نوسخه‌کانی به‌ره‌و ڕۆژنامه‌ به‌ناوبانگه‌کانی دونیا فه‌کس کرا. کاتژمێر ۳ ی دوانیوه‌ڕۆی ڕۆژی بڵاو بوونه‌وه‌ی ڕۆژنامه‌ هێزه‌ چه‌کداره‌کانی شوورای شۆڕشی ئیسلامی خۆیان کرد به‌ ده‌فته‌ری ڕۆژنامه‌ی ئیتیلاعات دا. حه‌یده‌ری له‌م باره‌وه‌ ئه‌ڵێت: به‌رپرسیاره‌تی هه‌موو شتێکم گرته‌ ئه‌ستۆ. ئه‌وان که‌ هاتبوون ڕاسته‌و خۆ به‌ بێسیم له‌ گه‌ڵ خه‌لخالی قسه‌یان ئه‌کرد. خه‌لخالی پێی ئه‌وتن بیانگرن ئه‌و وێنه‌یه‌ جه‌علیه‌و خۆیان دروستیان کردوه‌. نێردراوه‌کانی شوورای ئیسلامی داوای نێگه‌تیڤه‌کانیان کرد، پاشان بێسیمیان کرده‌وه‌ که‌ ئه‌و وێنانه‌ زۆر بوون ئه‌مان ته‌نها یه‌کیان چاپ کردوون. هێزه‌ چه‌کداره‌کان به‌و مه‌رجه‌ی که‌ ڕه‌زمی و به‌هرامی له‌ زووترین کاتدا خۆیان بناسێنن به‌  ئیتیلاعاتی تاران، ده‌فته‌ری ڕۆژنامه‌که‌یان چۆڵ کردوه‌. 

شتێکی کورت سه‌باره‌ت به‌ "ناسری سه‌لیمی": به‌ گوێره‌ی ئه‌و شتانه‌ی که‌ من بیستوومه‌ ناسری سه‌لیمی له‌ کاتی ئه‌و دادگایه‌ ناعادلانه‌دا‌  زۆر تووڕه‌ ئه‌بێت و  نێو چه‌وانی خه‌لخالی پڕ ئه‌کات له‌ تف و به‌ شێوه‌یه‌کی جه‌سوورانه‌ په‌لامار ئه‌دات که‌زه‌ربه‌یه‌ک بگه‌یه‌نێت به‌  خه‌لخالی به‌ڵام سه‌ربازه‌کان ناهێڵن و به‌ قۆناخه‌ تفه‌نگ له‌ ده‌ستی ئه‌ده‌ن و ئه‌یشکێنن.

 ناوه‌ندی پولیتزێر  دوێنێ ۲۴ ی مه‌ی خه‌ڵاتی باشترین وێنه‌ی به‌ دوو که‌س دا که‌ یه‌کیان جه‌هانگیر ڕه‌زمی به‌ بۆنه‌ی وێنه‌ی تیربارانی ئه‌و ۱۱ کورده‌وه‌و ئه‌وی تریشیان به‌ وێنه‌ گرێکی ئاسۆشتێدپرێس له‌ فه‌له‌ستین درا به‌ بۆنه‌ی وێنه‌ی ژنێک که‌ به‌ ته‌نیا خۆی هه‌وڵی به‌رنگاری له‌ گه‌ڵ کۆمه‌ڵێک سه‌ربازی ئیسرایلی ده‌کات. ئه‌وه‌ش بڵێم که‌ ڕه‌زمی له‌ کاتی وه‌ر گرتنی خه‌ڵاته‌که دا هیچ ناوێک  له‌ قوربانیانی وێنه‌ی ئه‌و تراژدیه‌‌ (کورد) نه‌برد.(کوشتن له‌وان و قوربانی له‌ ئێمه‌و خه‌ڵاتیش هه‌ر بۆ ئه‌وان)                                                                                                                                                                 

 سه‌رچاوه‌ی هه‌ندێ له‌ زانیاریه‌کان:                                       

BBC & VOA